VEDTEKTER FOR VEST-NORGES FISKESALSLAG

Vedteke på representantskapsmøte 11.06.87, godkjend av Fiskeridepartementet 08.10.87.

Sist endra i representantskapsmøte 23. april 2009.

Alle endringar er godkjende av Fiskeridepartementet 17. Juli 2009.


§1. FIRMA

Vest - Norges Fiskesalslag er ein salsorganisasjon for fiskarar med avgrensa ansvar, skiftande kapital og medlemstal.

Området til laget er Sogn og Fjordane fylke og Hordaland fylke. Salslagets kontor er i Måløy. Vernetinget er Fjordane Tingrett, Førde.

§2. FØREMÅL

Laget sitt føremål er, på forretningsmessig basis, å organisere omsetning på førstehand av fisk, produkt av fisk og skaldyr som vert landa i laget sitt distrikt, og som laget til ei kvar tid har lovvern for i medhald av råfisklova.

Gjennom omsetninga på førstehand skal laget søkje og oppnå gode prisar, og så gode og trygge betalingsvilkår for fiskarane.

Laget kan også åleine eller saman med andre, engasjere seg i produkt- og marknadsutvikling, vidare sal, eksport eller annan verksemd for å fremje laget sitt føremål.

Engasjement utover organisert førstehandsomsetning skal i tilfelle skje gjennom eigne selskap.


§3. KAPITAL, INNTEKTER

Laget skaffar seg kapital og inntekter gjennom ei avgift, rekna av salssummen for omsett fangst gjennom laget. Representantskapet avgjer til ei kvar tid storleiken på denne avgifta, som og må godkjennast av Fiskeri- og Kystdepartementet. Kvar medlem i laget svarer berre for si avgift.


§4. KRAV TIL LEVERING

All fangst som laget har lovvern for, skal leverast gjennom laget, eller med godkjenning av laget. Dei som har plikt til å omsette gjennom laget, har fortrinnsrett til dei omsetningssystem som laget tilbyr. Leverandørane må overhalde laget sine vedtekter og forretningsreglar, og reglar gitt i medhald av desse.

§5. MEDLEMSSKAP

Alle fiskarar som bur i laget sitt distrikt, og som har levert eller meldt inn fangst til laget på eigne namn for minst 1/2G, eller ved høvedsmann i eit av dei siste to åra, kan bli medlem av Salslaget. Utmelding av laget kan gjerast frå 31. Desember i kalenderåret etter at skriftleg utmelding er motteke.

Ei utmelding kan ikkje kallast tilbake etter 2 månader frå skriftleg utmelding er motteke. Eit medlem som har meldt seg ut kan ikkje takast opp som medlem i laget igjen før 1 år etter utmeldinga er gjort gjeldande.

Utmelding av laget eller opphøyr av medlemskap gjev ikkje rett til utbetaling av nokon del av laget sine midlar.

Medlemane pliktar å gjere seg kjend med, og rette seg etter, der føresegner som til ei kvar tid gjeld for laget.


§6. TILLITSVERV

Valbare er medlemer som oppfyller kravet til opptak i fiskarmanntalet, og som har levert eller meldt inn fangst gjennom laget for ein bruttoverdi av 1 G i eitt av dei to siste åra. Medlemer er valbare sjølv om dei som følgje av tillitsverv i fiskarane sine organisasjonar ikkje oppfyller kravet til inntekt.

Ingen kan vere meir enn anten i representantskapet, styret eller kontrollnemnda. Dei som kjøper av laget for sal, unnateke overtaking av eigen fangst, eller som har sterke band til slik forretning kan ikkje ha tillitsverv i laget.

Ingen kan veljast eller attveljast i laget etter fylte 67 år. Medlemer har plikt til å ta imot val til laget sine ombod, men kan nekte å ta i mot attval i så lang tid som dei har fungert.

§7. LEIING AV LAGET

Laget blir leia av representantskap på 21 medlemer, eit styre på 6 og eit arbeidsutval på 3 medlemer, samt ein direktør som blir tilsett av styret og godkjend av Fiskeri- og Kystdepartementet.

§8. REPRESENTANTSKAPET

Representantskapet har høgste rådvelde i laget. I representantskapet skal det vere 21 representantar og 42 vararepresentanter, valgt i dei ymse valdistrikt. Representantane skal veljast av og blant laget sine medlemer.
Salslaget sitt styre er valstyre. Valstyret iverkset valet og utarbeider instruks for vala, dette gjeld også reglar for førehandsrøysting.
Talet på representantar fordeler seg slik på dei ymse valdistrikt:

Nordfjord (Selje og Vågsøy) 6
Sunnfjord (Bremanger, Flora og Askvoll) 6
Sogn (Solund og Gulen) 3
Nordhordland 3
Sunnhordland 3

Representantskapet blir valt for 2 år om gongen.
Ved val av representantar bør ein ta rimeleg omsyn til at dei ulike grupper av reiskap som skal levere gjennom Salslaget bør vere representert i representantskapet.


§9. REPRESENTANTSKAPSMØTE

Ordinært representantskapsmøte skal haldast kvart år før juni månad er ute. Ekstraordinært representantskapsmøte bli halde når styre saman med representantskapet sin ordførar finn det turvande, eller minst tredjepart av representantane krev det skriftleg. Representantane vert kalla i hop til vanleg representantskapsmøte av styreformannen med skriftleg varsel på minst 14 dagar. Ekstraordinært representantskapsmøte kan kallast i hop med kortare varsel, og skal berre handsame dei saker som er nemnde i innkallinga. Med innkallinga til ordinært representantskapsmøte skal følgje sakliste for møte, årsmelding, utskrift av rekneskapen og ei utgreiing om dei saker som skal handsamast. Medlemane i styret, kontrollnemnda og laget sin direktør skal kallast inn til møte, og dei kan ta del i drøftinga, men har ikkje røysterett.

Representantskapet er ikkje vedtaksført utan at 2/3 av representantane er til stades.

Møter ikkje så mange, vert det kalla inn til nytt møte som er vedtaksført når minst halvparten av representantane møter.

Representantskapsmøtet blir leia av ordføraren eller varaordføraren i representantskapet. Ordføraren og varaordføraren vert valde av og mellom representantane ved særskilt val, og dei gjer teneste for eitt år om gongen til nytt val er halde. Skulle ordføraren eller varaordføraren ikkje verte valde inn i det nye representantskapet , fungerer den siste valde ordføraren eller varaordføraren som møtestyrar, men utan å ha røysterett.

Møte vel 2 sekretærar. Det skal førast bok over førehavingar på møtet. Møteboka skal lesast opp, godkjennast og skrivast under møtestyraren og sekretærane før møtet sluttar.


§10. RØYSTING

Kvar representant har ei røyst. Ein kan ikkje røyste med fullmakt. Når nokon krev det, skal røysting gjerast med setlar eller namneopprop. Krav om setlar går framom kravet om namneopprop. Alle saker med unntak av vedtektsendring blir avgjort med absolutt fleirtal. Dersom slik fleirtal ikkje blir oppnådd ved første avrøysting, blir det halde omval mellom dei to kandidatane som fekk flest røyster. Ved likt røystetal ved ny røysting blir valet avgjort ved lutdraging. Ved val til andre ombod blir kravd enkelt fleirtal. Dersom slikt fleirtal ikkje blir oppnådd ved første avrøysting, vert valet avgjord ved lutdraging mellom dei to kandidatane som fekk flest røyster.


§11. REPRESENTANTSKAPET SINE OPPGÅVER

Representantskapet skal ha føre:

1. Melding frå styret og kontrollnemnda over laget si verksemd i det året som er gått.
2. Rekneskapen for kalenderåret som er gått med melding frå kontrollnemnd og revisor.
3. Avgjerd om korleis overskot i årsrekneskapen skal nyttast, eller underskot dekkjast.
4. Føresegner for revisor og kontrollnemnd
5. Val på:

1. Styreformann og styremedlemer med personlege varamenn.
2. Formann og medlemer i kontrollnemnda og deira varamenn.
3. Medlemer i andre nemnder og utval.
4. Ordførar og varaordførar i representantskapet.
5. Revisor i samsvar med aksjelova. Laget sin revisor skal vere statsautorisert revisor.

6.   Avgjerd om godtgjersle til styret, kontrollnemnda og representantskapsmøte må vere komne til styret seinast 1 månad før møtet, og skal leggjast fram med styret si tilråding.

§12. STYRET

Styret for Salslaget skal ha 6 medlemer, 4 medlemer frå Sogn og Fjordane fylke, og 2 medlemer frå Hordaland fylke.

Formann og personleg varamann for han skal veljast først ved særskilt val for eit år. Dei andre 5 medlemane skal veljast for 2 år frå så ymse grupper av reiskap og stader i laget sitt distrikt som råd er. Første året går 2 styremedlemer ut ved lutdragning, og seinare etter tur. Det same gjeld varamenn. Styret vel mellom seg varaformann.


§ 13. STYREMØTE

Styremøte vert halde når formann eller minst 2 av styremedlemane krev det. Laget sin direktør kan vere med på møta, men har ikkje røysterett.

Over møte skal det førast bok som skal lesast opp, og alle som møter skriv under. Styret er vedtaksført når formann eller varaformann og minst 3 andre av styret er til stades. Ved like røystetal er røysta til formannen avgjerande.


§14. STYRET SINE OPPGÅVER

Styret skal:

1. Styre laget i samsvar med vedtektene, vedtak av representantskapet og eigen vedtak.
2. Fastsette forretningsreglar for drift av laget.
3. Tilsette direktør og turvande kontorhjelp. Gi føresegner for arbeidet og fastsett løna deira. Direktøren skal godkjennast av vedkommande departement.
4. Avgjere kven som skal forplikte laget med underskrifta si, og gje prokura.
5. Syte for turvande og trygg rekneskapsføring.
6. Ta avgjerd i andre saker enn dei som er nemnde i vedtektene og forretningsreglane. Søkje samarbeid med andre lag når tilhøva gjer det turvande. Slike saker med alle opplysningar skal leggjast fram for eit representantskapsmøte så snart det er høve til det.
7. Elles arbeide så godt det kan for laget sin tarv.
8. Fastsette tid og stad for nest ordinære representantskapsmøte.
9. Styret har rett til å ta andre avgjerder enn dei som i følgje vedtektene og representantskapets vedtak ligg til styret. Vilkåret for det er at saka hastar, og det anten ikkje er mogleg å leggje saka fram for representantskapet, eller at det vil føre til uheldig tidsspille eller urimelege kostnader. Melding om slike saker med opplysning av grunnen, skal leggjast fram for første representantskapsmøte.

§15. ARBEIDS- OG RÅDFØRINGSUTVAL

Styret kan mellom seg velje eit arbeidsutval med formannen og 2 styremedlemar, som medlemer for eitt år om gongen. Dette utvalet har makt til å ta avgjerd på vegne av styret. Styret set opp føresegner for utvalet. Over møte skal utvalet føre bok som og direktøren skriv under.


§16. KONTROLLNEMND OG OFFENTLEG KONTROLLØR

Laget skal ha ei kontrollnemnd som med formann og 2 medlemer som vert vald av representantskapet. Kontrollnemnda skal kontrollere rekneskapen, føre tilsyn med dei disposisjonar som styret og rådføringsutvalet gjer, og skal ha føre klagemål som medlemane kjem med. Kontrollnemnda er samstundes desisjonsnemnd.

Fiskeri- og Kystdepartementet skal ha høve til å nemnde opp ein offentleg kontrollør som skal lønast av Salslaget. Kontrolløren si løn vert fastsett av departementet.


§17. FOND

Det skal setjast av til reservefond inntil reservefondet saman med andelskapital utgjer like mykje som andelslaget si gjeld ved utgangen av rekneskapsåret. Inntil fondet har nådd den storleik som er fastsett i første ledd skal det setjast av eit beløp som svarar til 10% av overskotet kvart år for så vidt det ikkje går med til dekning av underskot frå tidlegare år som ikkje kan dekkjast av andre frie fond.

Reservefondet kan berre brukast til dekning av tap som ikkje kan dekkjast av andre frie fond. Er reservefondet større enn påbode, kan inntil 1/5 av det overskytande brukast til anna føremål enn nemnt i føregåande ledd.

§18. TVISTEMÅL

Oppstår det tvistemål mellom laget og sine medlemar, skal forlik prøvast ved ei meklingsnemnd på 3 medlemar, og av dei vel partane kvar sitt medlem mens nemnda sin formann vert oppnemnd av Fiskeridirektøren.

Dersom båe partar er samde om å la tvistemålet avgjerast ved valdgift, skal der gåast fram på same måten ved samansetjing av valdgiftsnemnd. Dersom forlik ikkje kjem i stand og partane ikkje blir samde om å la tvistemålet avgjerast med bindande verknad av valdgiftsnemnda, står det partane fritt å søkje tvistemålet avgjort ved vanleg rettargang.


§19. BROT PÅ VEDTEKTENE

Bryt nokon av medlemane laget sine vedtekter, forretningsreglar eller vedtak gjort i medhald av desse, kan styre ileggje medlemen ei bot. Elles gjeld reglane i råfiskloven § 6a.


§20. VEDTEKTSENDRING

Bridge i vedtektene kan gjerast berre av representantskapet med 3/4 fleirtal av dei møtande. Vedtektene og bridge av vedtektene skal godkjennast av Fiskeri- og Kystdepartementet.


§21. OPPLØYSING AV LAGET

Spørsmålet om oppløysing av laget kan bare behandlast på ordinært representantskapsmøte der minst 3/4 av representantskapet røyster for det, og at minst 2/3 av representantane er til stades. Møter ikkje så mange, vert nytt ekstraordinært representantskapsmøte kalla i hop.

Får framlegget 2/3 fleirtal av dei møtande i nytt møte, v ert laget å løyse opp. Representantskapet nemner opp eit avviklingsstyre på 5 medlemer. Dette avviklingsstyret avgjer så kva laget sin kapital skal verte brukt til. Avviklingsstyret si avgjerd treng godkjenning av departementet.